Isa 2 | ZomZIV | STEP | Hih in Judah le Jerusalem tawh kisai Amoz tapa Isaiah muhna ahi hi:

Isaiah 2

TOPA’ Mual

1 Hih in Judah le Jerusalem tawh kisai Amoz tapa Isaiah muhna ahi hi: ^a

2 Ni nunungte ah

TOPA’ biakinnpi mual,
mualliante laka a lian pen bangin kikipsak dinga; ^b
mual neute tungah kisangsakin
minamte khempeuh in a zuan zuahzuah ding uh hi. ^c

3 Mi tampite pai-in, ^d

“Hong pai un, TOPA’ mual tung
Jacob Pasian inn ah va paito ni. ^e
Amah in a lampite i zuih theih nadingin
eite hong hilh ding hi,” ci ding uh hi.
Zion panin thukham hong paikhia dinga, ^f
Jerusalem panin TOPA kammal hong paikhia ding hi. ^g
4 Amah in minam khat le khat kikal ah thu khen dinga,
mi tampi kitotna a vengsak ding hi. ^h
Amaute in a namsaute uh tu in sek ding uh a,
a teipite uh tem mukkawi-in a sek ding uh hi. ⁱ
Minam khat in minam khat tungah namsau liik nawn loin
galsim dingin zong a kisin nawn kei ding uh hi. ^j
5 Jacob innkuante aw hong pai un,
TOPA khuavak sung ah kalsuan ni. ^k

TOPA’ Ni

6 Nangmah in na mite,
Jacob innkuan na nusia khin hi. ^l
Amaute Nisuahna lam pana dawivaite tawh kidim uh a,
Philistia-te bangin ai sanin,
lawkite tawh kikhutlet uh hi. ^m
7 Amau gamah ngun le kham dim a, ⁿ
a goute uh a bei ngei kei hi. ^o
Amaute gamsung sakol tawh kidim a,
sakolleng a bei ngei kei hi. ^p
8 Amaute in a gam uh milimte tawh dimsak uh a,
a khutun a bawlsate uh
a khutmete uh bawlsate a bia uh hi. ^q
9 Tua bangin mite kiniamsak sukin
mihingte kiniamkhiat hi -
amaute ^{▼▼2.9 Ahikeh amaute thotosak kei un} maisak kei in. ^s
10 TOPA kihtakna le
a mulkimhuai ama thupina panin ^t
suangheng ah lut unla
leihawm ah bu un. ^u
11 Mite kiliatsakna mitte kiniamkoih dinga,
mite kiphatsakna kiniamsak ding hi; ^v
tua ni ciangin TOPA bek kitawisang ding hi. ^w
12 Thahatpen TOPA in
a kisathei le a kiliansak khempeuh,
a kitawisangte khempeuh ^x
(tuateh amaute a kiniam koih ding hi),
13 a sang, a kisangsak Lebanon tamtakte khempeuh le ^y
Bashan tawsawte khempeuh
14 muallian kuite khempeuh le
mualneu sangte khempeuh,
15 tausangpi peuhmah le ^z
kulh muanhuai peuhmah,
16 sumbawl tembawpi ^{▼▼2.16 Hebrew in Tarshish tembaw peuhmah} peuhmah le tembaw hoih peuhmah
a niamkoih ding ni khat sehkhol zo hi. ^ab
17 Mite kiliatsakna kiniamsak dinga, ^ac
mite kiphatsakna kiniamkoih ding hi;
tuani-in TOPA kia bek kitawisang dinga,
18 milimte a maimang kiuhkeuh ding hi. ^ad
19 TOPA in ama thupina nopcitna tawh ^ae
leitung lingsak dinga, a kipat ciangin ^af
amah kihta-in
mihingte suangpi heng kawm le ^ag
leihawm vang sungah a tai ding uh hi.
20 Tua ni ciangin mite in
a biak dingua a bawl uh ^ah
ngun milimte le kham milimte,
buite le bakte tungah a lot ding uh hi.
21 TOPA in ama thupina nopcitna tawh
leitung lingsak dingin a kipat ciangin ^ai
amah kihta-in
amaute suanghawmpi sung le ^aj
ken sangpi hawm sungah a tai ding uh hi.
22 Nak vanga huusang bek mihing
muang nawn kei un. ^ak
Amah banga simtak ahi hiam? ^al